wrapper

Хабарҳо

Барномаи давлатии дастгирии соҳибкорӣ дар Ҷумҳурии Тоҷикистон барои солҳои 2012 2020, ки бо мақсади фароҳам овардани шароити мусоид барои фаъолияти пурсамари субъектҳои соҳибкорӣ қабул шудааст, дар ҷумҳурӣ, аз ҷумла бандҳои ин барнома дар Вилояти Мухтори Кӯҳистони Бадахшон дар амал татбиқ шуда истодаанд.

Сардори Раёсати сармоягузорӣ ва идораи амволи давлатии вилоят Зикрихудо Самадзода изҳор дошт, ки вазифаҳои барномаи мазкур ин дастгирии молиявии соҳибкорӣ, сода кардани шеваи дастрасии соҳибкорон ба техникаву механизмҳои муосир ва дар ин самт муқаррар намудани баъзе имтиёзҳо, ҷудо кардани қитъаи замин барои бунёди корхонаҳои истеҳсолӣ, аз байн бурдани монеаҳои маъмурӣ ҳангоми ташкил ва пешбурди тиҷорат, рушди ҳарчи бештари соҳибкории хур­ду миёна, таъсиси ниҳодҳои худкифои соҳибкорӣ дар шакли кооперативҳои истеҳсолӣ, фурӯшӣ ва қарзӣ, таъмини дастгирии иттилоотӣ ва машваратии соҳибкорӣ, мусоидат дар омода наму­дан ва баланд бардоштани такмили их­тисоси кадрҳо барои бахши соҳибкорӣ иборат мебошанд.

Барномаи мазкур дар се марҳала - марҳалаи якум барои солҳои 2012 – 2014; марҳалаи дуюм барои солҳои 2015 – 2017; марҳалаи сеюм барои солҳои 2018 – 2020 татбиқ шудааст.

Бояд қайд намуд, ки марҳалаҳои якум ва дуюми Барномаи дастгирии давлатии соҳибкорӣ дар асоси Нақшаи чорабиниҳо, ки бо қарорҳои Ҳукумати Ҷумҳурии Тоҷикистон аз 30 апрели соли 2012, таҳти рақами 201 ва аз 1 декабри соли 2014, таҳти рақами 740 тасдиқ гардида буданд, мавриди татбиқ қарор гирифтанд.

Аз соли 2018 марҳалаи сеюми татбиқи Барномаи дастгирии давла­тии соҳибкорӣ оғоз гардидааст, ки дар самти дастгирии давлатии фаъо­лияти субъектҳои соҳибкорӣ яке аз санадҳои асосӣ ба ҳисоб меравад. Дар марҳалаи сеюми татбиқи ин барнома мақсад гузошта шудааст, ки муносибатҳои муосири иқтисодӣ та­вассути такмили қонунгузорӣ, рушди низоми иҷрои қарордодҳо ва идора­кунии корпоративӣ, таъмин намудани ҳуқуқи молумулкӣ, бартараф кардани монеаҳои маъмурӣ, афзоиш дода­ни сармоягузорӣ ва коҳиш додани хавфҳои эҳтимолӣ таҳким бахшида шаванд.

Дар натиҷаи тадбирҳои амали­намудаи Ҳукумати мамлакат дар самти таъмин намудани пешрафти соҳаҳои иқтисоди миллӣ ва таҳкими ҳамкории судманд бо шарикони рушд ҳаҷми воридоти сармояи хориҷӣ ба иқтисодиёти вилоят мунтазам афзоиш ёфта истодааст. Умуман, дар давраи соҳибистиқлолӣ дар ҳудуди вилоят 25 лоиҳаи давлатии сармоягузорӣ дар ҳаҷми беш аз 1 миллиарду 200 милли­он сомонӣ ба анҷом расидааст, ки асо­сан, бо бунёду таҷдиди инфрасохтор алоқаманд мебошад.

Мутобиқи қарори Ҳукумати Ҷумҳурии Тоҷикистон аз 31 майи соли 2012 “Дар бораи тасдиқи Қоидаҳои пешбурди Феҳристи ягонаи давлатии электронии ҳуҷҷатҳои иҷозатдиҳӣ ва Қоидаҳои пешбурди Феҳристи ҳуҷҷатҳои иҷозатдиҳӣ” мақомоти иҷозатдиҳанда вазифадор гардидааст, ки ҳар сол дар моҳи декабр вобаста ба пешбурди Феҳристи ҳуҷҷатҳои иҷозатдиҳӣ ба мақоми ваколатдори давлатӣ дар соҳаи танзими низоми иҷозатдиҳӣ маълумоти хаттӣ пешниҳод намояд.

Мутобиқи Қонуни Ҷумҳурии Тоҷикистон “Дар бораи низоми иҷозатдиҳӣ” 19 адад мақомоти ва­колатдори давлатии иҷозатдиҳанда муқаррар карда шуданд, ки дар бароба­ри дигар мақомоти дахлдор, ҳамзамон, мақомоти иҷроияи ҳокимияти давлатӣ низ ҳамчун мақомоти ваколатдори давлатии иҷозатдиҳанда ба шумор меравад.

Бояд зикр кард , ки аз ҷониби Мақомоти иҷроияи ҳокимияти дав­латии шаҳри Хоруѓ ва ноҳияҳои ви­лоят вобаста ба пешбурди ҳуҷҷатҳои иҷозатдиҳӣ, яъне ба унвонии Кумитаи давлатии сармоягузорӣ ва идораи ам­воли давлатии Ҷумҳурии Тоҷикистон тибқи мактуби расмӣ аз 1 феврали соли 2019 оид ба ҷамъбасти мониторинги татбиқи Қонуни Ҷумҳурии Тоҷикистон аз 2 августи соли 2011 «Дар бораи ни­зоми иҷозатдиҳӣ» дар шаҳру ноҳияҳои вилоят гузориш муфасал пешниҳод карда шудааст.

Дар доираи ислоҳоти низоми иҷозатдиҳӣ шумораи иҷозатҳо аз 605 то 74 номгӯй кам гардида, дар ин замина, дар кишвар Феҳристи яго­наи давлатии электронии ҳуҷҷатҳои иҷозатдиҳӣ ҷорӣ гардид. Имрӯз дар мамлакат бо мақсади баланд бар­доштани самаранокии идоракунии давлатӣ раванди таъсиси “Равзанаи ягона” оид ба гирифтани иҷозат ба­рои сохтмон, бақайдгирии амволи ғайриманқул, амалиёти содироту во­ридот ва транзит, ҷараёни роҳандозии хизматрасониҳои электронии давлатӣ, ба шакли электронӣ гузаронидани ҳуҷҷатгузорӣ ва муосир гардонидани махзани маълумоти мақомоти танзими давлатӣ оғоз шудааст.

Дар чанд соли охир бо пешниҳоди соҳибкорону сармоягузорон қонунгузорӣ дар самти ҳимоя ва дастгирии давлатии соҳибкорӣ, сармоягузорӣ ва санҷиши фаъолияти субъектҳои хоҷагидор такмил дода шуд. Бо мақсади беҳтар намудани маъмурикунонии андоз ва дастгирии соҳибкорӣ ба Кодекси андоз ва Кодекси гумруки Ҷумҳурии Тоҷикистон тағйиру иловаҳо ворид карда шуданд. Дар маҷмӯъ, тағйиру иловаҳои воридшуда 30 номгӯйи имтиёзу сабукиҳоро дар бар мегиранд, ки ба беҳтар гардидани фазои сармоягузориву соҳибкорӣ дар бахшҳои воқеии иқтисодиёт ва соҳаи хизматрасонӣ равона карда шудаанд.

Дар мамлакат бо мақсади дастги­рии давлатии соҳибкории истеҳсолӣ ва ворид кардани таҷҳизоти муосири технологӣ, инчунин, афзоиш додани ҳаҷми истеҳсоли маҳсулоти ватанӣ во­ридоти як қатор таҷҳизоти истеҳсоливу технологӣ аз андоз аз арзиши иловашу­да ва боҷи гумрукӣ озод карда шудааст. Илова бар ин, аз 1 январи соли 2018 воридоти ҳама намудҳои таҷҳизоти истеҳсоливу технологӣ ва қисмҳои такмилдиҳандаи он аз андоз аз арзиши иловашуда ва боҷи гумрукӣ озод карда шудааст.

Дар асоси пешниҳоди мақомоти андози Вилояти Мухтори Кӯҳистони Бадахшон дар Қонуни Ҷумҳурии Тоҷикистон “Дар бораи хоҷагиҳои деҳқонӣ (фермерӣ)” бандҳои алоҳида бо мазмуни зерин ворид карда шуданд: Хоҷагиҳои деҳқонӣ (фермерӣ) бо тар­тиби муқаррарнамудаи қонунгузории Ҷумҳурии Тоҷикистон аз тарафи як нафар ё гурўҳи шахсони воқеӣ дар шаклҳои зерин таъсис дода мешаванд:

- бо таъсиси шахси ҳуқуқӣ, бо шу­мораи аз 1 то 50 нафар аъзо;

- бо таъсиси шахси ҳуқуқӣ бе дар­назардошти шумораи аъзо.

Инчунин, усули бақайдгирии андоз­супорандагон дар мақомоти андоз аз аввали соли ҷори ройгон анҷом дода мешавад. Яъне андозсупорандагон дар мақомоти андоз бе ситонидани боҷи давлатӣ ва дигар пардохтҳо ба қайд гирифта мешаванд, ки ба фаъоли­яти самараноки соҳибкорон мусоидат мекунад.

Раёсати сармоягузорӣ ва идораи амволи давлатии вилоят бо соҳибкорон робитаи қавӣ барқарор карда, кўшиш менамояд, ки барои тавсеаи бешта­ри фаъолияташон шароити зарурӣ фароҳам орад. Дар моҳи марти соли 2020 устодони факултаи иқтисоди Донишгоҳи давлатии шаҳри Хоруғ дар ҳамкорӣ бо кормандони Раёса­ти сармоягузорӣ ва идораи амволи давлатии вилоят оид ба беҳтар на­мудани фазои сармогузорӣ бо на­мояндагони бахши хусусӣ мулоқот анҷом доданд. Ба намояндагони бахши хусусӣ дар мавзӯи Қонуни Ҷумҳурии Тоҷикистон «Дар бораи санҷиши фаъо­лияти субъектҳои хоҷагидор» ва дигар санадҳои меъёрии ҳуқуқии танзимку­нандаи санҷиши фаъолияти субъектҳои хоҷагидор, мазмуну моҳият ва талаботи қонунгузории мазкур пурра шарҳу тавзеҳ дода шуд. Ҳамчунин, баҳри аз байн бурдани омилҳои эҷодкунандаи монеаҳо бо ширкати мутахассисони Раёсати сармоягузорӣ ва идораи амво­ли давлатии вилоят ва раёсати андози вилоят дар се моҳ як маротиба барои соҳибкорон семинар – машварат баргузор мекунанд, ки дар он тамоми паҳлуҳои соҳаи соҳибкорӣ мавриди таҳлилу баррасӣ қарор мегиранд.

Довари БОВАР,

ВМКБ

Матни шарҳи шумо…

Обуна

 

Дар бораи мо

Шумораи нахустини ҳафтаномаи «Боҷу хироҷ» 26 декабри соли 1998, ҳамчун нашрияи Кумитаи андози назди Ҳукумати Ҷумњурии Тоҷикистон, бо номи «Паёми андоз» аз чоп баромада дастраси хонандагон гардид.

Рӯзномаи “Боҷу хироҷ” ягона нашрияи иқтисодии ҷумҳурӣ буда, дар инъикоси фаъолияти иқтисодии кишвар ва ғановати буҷети давлатӣ саҳми арзанда мегузорад. Дар саҳифаҳои рӯзнома амру фармонҳои Президенти Ҷумҳурии Тоҷикистон, қарорҳои Ҳукумати Ҷумҳурии Тоҷикистон, қонунҳои Ҷумҳурии Тоҷикистон, Фармоишҳои Раиси Кумитаи андози назди Ҳукумати Ҷумҳурии Тоҷикистон, маводҳо роҷеъ ба андозу иқтисод ва фаъолияти соҳибкорӣ, умури бонкӣ ва муҳосибот, ҳуқуқу уҳдадориҳои андозсупоранда, шарҳи Кодекси андоз, инчунин фарҳанги ҷомеаи ҷаҳон ба табъ мерасанд.

PDF